Wednesday, April 14, 2021
Home ၶၢဝ်ႇ ၵၢၼ်သိုၵ်း ၽွင်းသိုၵ်းမၢၼ်ႈလႄႈ RCSS ၶဵင်ႈၶႅင်ၵၢၼ်သိုၵ်းၵၼ်ယူႇၼႆႉ TNLA တင်း SSPP ပိုတ်ႇၼႃႈသိုၵ်းၸူး RCSS (5) ဢွင်ႈတီႈ ၼႂ်းဝၼ်းလဵဝ်

ၽွင်းသိုၵ်းမၢၼ်ႈလႄႈ RCSS ၶဵင်ႈၶႅင်ၵၢၼ်သိုၵ်းၵၼ်ယူႇၼႆႉ TNLA တင်း SSPP ပိုတ်ႇၼႃႈသိုၵ်းၸူး RCSS (5) ဢွင်ႈတီႈ ၼႂ်းဝၼ်းလဵဝ်

ၵၢင်ၼႂ်ၸဝ်ႉ ၼႃႈမိူင်းပႆႇလႅင်းၼႆႉ ၸုမ်းသိုၵ်း TNLA တင်း SSPP/SSA ႁူမ်ႈၵၼ်လေႃႇတိုၵ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၼႂ်းၽွင်းယၢမ်းလဵဝ်ၵၼ် 5 ဢွင်ႈတီႈ။

မိူဝ်ႈၼႆႉ ဝၼ်းထီႉ 13 February 2021 (လိူၼ်သၢမ်မႂ်ႇ 2 ၶမ်ႈ ပီတႆး 2115 ၼီႈ) ၶၢဝ်းယၢမ်း ၵၢင်ၼႂ်ၸဝ်ႉ 05:00 မူင်းၼၼ်ႉ ၸုမ်းသိုၵ်း TNLA လႄႈ SSPP/SSA ၸႂ်ႉႁႅင်းသိုၵ်းတင်းၼမ် ႁူမ်ႈၵၼ်သေ ပိုတ်ႇၼႃႈသိုၵ်း ၶိုၼ်ႈလေႃႇတိုၵ်း တပ်ႉပၢင်သဝ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ဢၼ်ပၵ်းဝႆႉတီႈ မႆႉႁုင်းလဝ်း ၵွင်းမူးၶမ်း ဢိူင်ႇတေႃႉသၢင်ႇ ၸႄႈဝဵင်းၵျွၵ်းမႄး ၸိုင်ႈတႆးပွတ်းႁွင်ႇ ၼႆယဝ်ႉ။

ၼွၵ်ႈလိူဝ်သေ တီႈတေႃႉသၢင်ႇယဝ်ႉ  ၸုမ်းသိုၵ်း TNLA လႄႈ SSPP/SSA လႆႈပိုတ်ႇၼႃႈသိုၵ်း ၶိုၼ်ႈလေႃႇတိုၵ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA တီႈတွင်ႇပလူဝ်ႉ၊ တီႈလွႆၼူၵ်ႉယုင်း လႄႈ တီႈႁိမ်းဝၢၼ်ႈႁူးၼင်း ဢိၵ်ႇတင်းထႅင်ႈ တီႈႁိမ်းဝၢၼ်ႈလွႆ သူပ်းႁူၺ်ႈၼၼ်ႉ ထႅင်ႈ 2 ဢွင်ႈတီႈ ဝႃႈၼႆ။

ၽွင်းယၢမ်းပၢင်တိုၵ်းၼႆႉၵေႃႈ သိုၵ်း TNLA တင်း SSPP လႆႈဢဝ်မၢၵ်ႇလူင် 60 MM ယူႇတီႈၼမ်ႉတူၺ် ပိုတ်းယိုဝ်းၵႂႃႇတီႈလွႆၼူၵ်ႉယုင်း ဢိၵ်ႇတင်းထႅင်ႈ တီႈလွႆယဵၼ်ၼၼ်ႉၵေႃႈ ဢဝ်မၢၵ်ႇလူင် 60 MM ပိုတ်းယိုဝ်းသႂ်ႇႁၢဝ်ႈႁၢဝ်ႈႁႅင်းႁႅင်းသေ တဵၵ်းၸႂ်ႉၵူၼ်းသိုၵ်းၶဝ် ၵၢၼ်းၶိုၼ်ႈယိုဝ်းတင်း 2 ဢွင်ႈတီႈ လႄႈ တႄႇၸဵမ်မိူဝ်ႈၶၢဝ်းယၢမ်းၵၢင်ၼႂ်ၸဝ်ႉ 05:00 မူင်း တေႃႇပေႃးထိုင် ၶၢဝ်းယၢမ်းၸမ် 10:00 မူင်းယဝ်ႉၼႆႉ သဵင်ၵွင်ႈသဵင်မၢၵ်ႇ တိုၵ်ႉမေႃးပၼ်းၼၼ်ႈဝႆႉယူႇ ၼႆယဝ်ႉ။

ၼႂ်းဝၼ်းထီႉ 7 February 2021 ယၢမ်းၵၢင်ၶိုၼ်း 22:10 မူင်း ၼၼ်ႉၵေႃႈ ယွၼ်ႉသိုၵ်း  TNLA ၶိုၼ်ႈယိုဝ်း RCSS/SSA ဢွၼ်တၢင်းလႄႈ သဵင်ၵွင်ႈသဵင်မၢၵ်ႇလႆႈတႅၵ်ႇ တီႈၽၢႆႇႁွင်ႇဝၢၼ်ႈ ပၢင်မၢၵ်ႇမိုဝ်းသေ ၵူၺ်းၵႃႈ လွင်ႈၼႆႉ TNLA သမ်ႉၶိုၼ်းဢွၵ်ႇၶေႃႈပိုၼ်ၽၢဝ်ႇၵၢဝ်ႇၼႄးဝႃႈ RCSS/SSA ၵႂႃႇပိုတ်းယိုဝ်း TNLA ဢွၼ်တၢင်း ၼႆယဝ်ႉ။

ၼင်ႇႁိုဝ် ပေႃးတေမီး လွင်ႈၶိုၼ်ႈယႂ်ႇၵတ်းယဵၼ်ၼိမ်သဝ်း ၼႂ်းမိူင်းတႆးလႄႈ ၽွၼ်းလီပုၼ်ႈတႃႇ ပေႃႈမႄႈၵူၼ်းမိူင်းၼႆသေ RCSS လႆႈပိုၼ်ၽၢဝ်ႇၵိုတ်းတိုၵ်းတေႃႇ TNLA တႄႇၸဵမ်မိူဝ်ႈဝၼ်းထီႉ 7 February 2021 ဢၼ်ပဵၼ်ၼႂ်းဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 74 ပီႊ တေႃႇပေႃးထိုင် ဝၼ်းထီႉ 21 May 2021 သေတႃႉ ၵူၺ်းၵႃႈ သိုၵ်း TNLA လႄႈ ၸုမ်းဢူၺ်းလီမၢင်ၸုမ်း တိုၵ်ႉသိုပ်ႇပိုတ်ႇပၢင်တိုၵ်းၸူး ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၼႂ်းမိူင်းတႆးပွတ်းႁွင်ႇ ဢမ်ႇထၢတ်ႇဢမ်ႇဝၢႆး ယူႇယဝ်ႉ။

ထႅင်ႈၽၢႆႇၼိုင်ႈတၢင်းၼိုင်ႈၵေႃႈ သိုၵ်းမၢၼ်ႈ လႄႈ RCSS/SSA တိုၵ်ႉၶဵင်ႈၶႅင်ၵၢၼ်သိုၵ်းၵၼ်ဝႆႉ တီႈၼႂ်းဢိူင်ႇမိူင်းတုင် ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ လႄႈ ၼႂ်းၸႄႈဝဵင်းမိူင်းၵိုင် ၸိုင်ႈတႆးပွတ်းၸၢၼ်း လႆႈႁူႉၸွမ်းၶၢဝ်ႇ မီးၼင်ႇၼႆ။

တႆးလွတ်ႈလႅဝ်း

Most Popular

Recent Comments